AEDIGAL participa na xornada estatal de sustentabilidade de Plena inclusión España

O presidente de FADEMGA Plena inclusión Galicia e de AEDIGAL, Eladio Fernández, participou o pasado 24 de setembro na xornada “Sostener para avanzar”, organizada por Plena inclusión España e FADEMGA, onde reivindicou que a sustentabilidade das entidades pasa por manter ás persoas no centro, e compartiu a súa visión da sustentabilidade que vai máis alá da viabilidade económica.

Neste se ntido, destacou a importancia de que as familias sigan sendo parte activa das organizacións, non só como destinatarias dos servizos, senón tamén participando na toma de decisións e na definición do futuro das entidades. Tamén puxo o foco na necesidade de aumentar o protagonismo das propias persoas con discapacidade intelectual e do desenvolvemento na gobernanza das organizacións que existen para apoialas.

Desde a súa dobre responsabilidade á fronte de FADEMGA e AEDIGAL, subliñou que a sustentabilidade debe entenderse de forma ampla, combinando a solidez económica coa preservación  dos valores e da identidade que deron orixe ao movemento asociativo.

O presidente advertiu de que os retos económicos, tecnolóxicos e laborais non deben facer esquecer o esencial: “soster non é manter estruturas, senón conseguir que o proxecto siga tendo sentido para as persoas e as familias que o fixeron posible”.

A súa intervención concluíu cun chamamento a conservar a esencia do movemento asociativo ao tempo que se promove a adaptación e o cambio necesarios para continuar ofrecendo respostas útiles ás persoas con discapacidade intelectual e ás súas familias no futuro.

No marco desta mesma xornada, o vicepresidente de AEDIGAL, Javier García, foi o encargado de presentar e entregar os recoñecementos da sección de Prácticas Exemplares nas categorías de “Coidado das persoas e desenvolvemento de equipos” e “Calidade”. Os galardóns foron para FUTUCAM e ASPACE Bizkaia, respectivamente, en recoñecemento ás súas boas prácticas e ao seu compromiso coa mellora continua.

A participación de AEDIGAL neste encontro reforza o seu compromiso cun modelo de organización sostible, centrado nas persoas, na participación das familias e na calidade dos apoios prestados.