AEDIGAL colabora na xornada “Construíndo emprego”, un encontro para impulsar novos futuros laborais para as persoas con discapacidade intelectual

AEDIGAL participou como entidade colaboradora na organización da xornada “Construíndo emprego. 25 anos de alianzas e novos futuros laborais para as persoas con discapacidade intelectual”, celebrada este martes na Cidade da Cultura de Santiago de Compostela e impulsada por FADEMGA Plena inclusión Galicia con motivo do 25 aniversario do seu Servizo de Emprego e Formación.

O encontro reuniu a representantes das administracións públicas, empresas, entidades sociais, profesionais, familias e persoas con discapacidade intelectual para facer balance do camiño percorrido no ámbito do emprego inclusivo en Galicia e, ao mesmo tempo, abrir unha reflexión compartida sobre os retos que aínda quedan por diante nun mercado laboral cada vez máis cambiante.

Dende AEDIGAL, a xornada supuxo unha oportunidade para poñer en valor o papel das entidades e das empresas na construción dun modelo de inclusión laboral baseado na colaboración, na profesionalización dos apoios e na xeración de oportunidades reais para as persoas con discapacidade intelectual.

Durante a inauguración institucional, diferentes representantes públicos destacaron a traxectoria de FADEMGA Plena inclusión Galicia e o traballo desenvolvido ao longo destes 25 anos para impulsar un modelo de emprego centrado nos dereitos, nos apoios personalizados e na cooperación entre administracións, terceiro sector e tecido empresarial.

O primeiro panel, “As orixes do emprego inclusivo en Galicia”, permitiu facer memoria dos primeiros pasos dun modelo que, hai 25 anos, comezou a abrir novas oportunidades laborais para as persoas con discapacidade intelectual, avanzando dende enfoques máis asistenciais cara a unha mirada baseada na participación, na autonomía e no acceso real ao mercado laboral ordinario.

A xornada tamén puxo o foco no acceso ao emprego público, un dos grandes avances destes anos e tamén un dos ámbitos nos que é necesario seguir consolidando medidas estables. Neste espazo abordouse a evolución das convocatorias específicas, a adaptación dos procesos selectivos e o impacto que supón para as persoas con discapacidade intelectual acceder a un posto público en termos de estabilidade, recoñecemento profesional e proxecto de vida.

Outro dos momentos destacados da mañá foi o panel dedicado ás alianzas empresariais que abriron camiño ao emprego con apoio en Galicia, no que se visibilizou o valor da colaboración entre empresas e entidades sociais. A través de experiencias concretas, como a de persoas traballadoras e SYC Applus+ ITV, quedou patente que o emprego inclusivo funciona cando existen apoios adecuados, confianza mutua, compromiso profesional e unha mirada empresarial capaz de recoñecer o talento diverso.

Para AEDIGAL, este tipo de alianzas son fundamentais para avanzar cara a un mercado laboral máis inclusivo, sostible e conectado coa realidade produtiva. A inclusión laboral non pode depender só da vontade individual nin de experiencias illadas, senón que precisa planificación, estruturas de apoio, colaboración entre axentes e unha aposta clara por parte das empresas e das entidades.

A xornada incluíu tamén un acto de recoñecemento institucional ás persoas, entidades, organismos e empresas que contribuíron ao longo destes anos a facer posible o emprego inclusivo en Galicia. Neste marco, rendeuse homenaxe, entre outros recoñecementos, a Valeriano Martínez, quen recibiu a título póstumo un galardón polo seu compromiso co emprego público inclusivo. O premio foi recollido polo conselleiro de Facenda e Administración Pública, Miguel Corgos, en representación da familia.

Xa pola tarde, a reflexión orientouse cara aos desafíos de futuro. O panel “Innovación social no emprego” abordou o valor de novas metodoloxías como o emprego personalizado, así como a necesidade de seguir creando alianzas co tecido empresarial para conectar capacidades, intereses e apoios coas necesidades reais do mercado laboral.

A formación foi outro dos eixos centrais da xornada a través do panel “A importancia dunha formación adaptada”, no que se subliñou que non hai emprego inclusivo sólido sen itinerarios formativos accesibles, flexibles e conectados coa realidade produtiva. Adaptar a formación non significa baixar o listón, senón eliminar barreiras para que o talento poida aparecer, crecer e ter percorrido.

O último panel, “Emprego ao longo da vida: novos apoios, novas miradas”, puxo sobre a mesa un dos grandes retos actuais: garantir que o emprego inclusivo non remate no acceso inicial a un posto de traballo, senón que poida sosterse, evolucionar e adaptarse ás distintas etapas da vida laboral de cada persoa.

Dende AEDIGAL, a participación nesta xornada reafirma o compromiso da patronal co impulso dun modelo laboral máis inclusivo, máis profesionalizado e con maior capacidade de resposta ás necesidades das persoas con discapacidade intelectual e das entidades que lles prestan apoio.

A xornada contou coa colaboración da Xunta de Galicia, a Deputación da Coruña, Fundación ONCE e a Fundación Cidade da Cultura.